只有你和我

其他人彷彿隱沒了，只有我倆在船頭，
聽你訴說過去的喜樂與哀愁，這些都己隨風飄散。
當你將腳伸出船，笑著說浪濺到了，
才感覺到那與你年紀相配的天真。
我指著小島說那是鯨魚，不，你說是河馬，
還指出了眼睛的所在，是，你說得對。
我們的視角不同，不會走在一起，
所以這一程特別浪漫。

風吹火起

在火勢微弱的時候，
來了一陣風，
將炭心吹得紅紅的，
轉眼又見火起。

跳舞有時

每年到黑池比賽的舞蹈老師，履歷看來很有趣，
實際上卻不肯定，我們只是言不及義地閒聊。

跳舞有感應，我相信這種直覺。
這天換了二十個partner，電流微弱。

為一棵樹放棄整個森林，
為森林放棄每一棵樹，
哪種做法較愚蠢？

我愛巴士

昨天實在後悔得要命，
過了鬼節一切回復正常。
坐巴士回家，呀，還是巴士好；
鄰坐的女孩十分疲累，
不斷釣魚兼撞玻璃，
終於我忍不住說要借肩膀給她，
她說自己撞了很多次，
半醒地笑著的神情甚悄，
這後半程她肯定睡不著。

撞鬼

在IFC閒逛時見到藝術展，當然駐足留連。
同場見一草帽少女駐足看畫，
彼此錯身而過，我還是看不清她的樣子。
後來我繞到外邊看飾物，
實在是在看她，
她卻從另一邊走來，
我們並肩了好一會兒，
真是鬼掩嘴我竟然沒有撘訕，
這幾乎不可能的錯失肯定跟天時有關，
是日為農曆七月十四。

疑似大肚

巴士上見到某女子穿著鬆身連身裙，企得唔係好自在。
究竟佢係咪大肚呢？
唔係好見肚，但正常黎講又無理由著咁鬆身既裙而唔帶belt，
咁當然無理由問「喂你係咪大肚呀，係我讓個位俾你坐。」
正當我猶疑之際佢望過黎，我就博一博問佢坐唔坐，
佢搖搖頭，然後同老外情人笑作一團。
雖然瘀左，但黎多次都係要博，
正所謂唔怕一萬至怕萬一。

理性與瘋狂

Habitu坐得舒服，音樂好，話題更妙，
人與人之間的心理牽扯實在微妙。
有人想做宇宙中心，
有人專門製造藉口，
有人用語言強暴靈魂，
你覺得人本來是瘋狂的，
理性不就是一塊遮羞布嗎？
一寸肌膚一分誘惑，
我覺得自己保守得像個伊斯蘭婦女，
由頭包到腳，只露出一雙眼睛，
紗布之下卻比誰都熱。

話別

一席話，勝似多少相聚。
相見歡，平生難得幾回。

得遇知己，一杯不少。
醉夜清酒，不讓風雨。

老地方見

假期的中大特別寧靜，
時間流動得特別緩慢。
百萬大道上踱步，
坐在樹蔭下乘涼，
低頭睇書抬頭望雲，
看著行人來來往往，
等待故人出現，
一切如在昨日。

沙灘味

今日落地獄，見到魔鬼差點透不過氣，
我和jacky分別烤問，每人五十大板，
可惜趕住替死上唔切身。
返回人間遇到齆鼻菩薩，
她憑氣味問我係咪落完地獄？
我話係，而且願意永不超生。

人考試我考試

偷呃考試題目，拐騙答案來讀。
有心人煮飯，無恥人吃免費午餐。
見到同學三吋厚notes，
即刻收埋我果幾張爛鬼紙。
速讀速寫速收工，
夠鐘又話俾多五分鐘，
又夠鐘又話有特別題做多五分鐘，
如此折磨，唔走就傻。

血仍未冷

七一，酷熱天氣警告生效。

有人理行公民義務，有人追求個人自由。

上街遊行，民怨沸騰，怒火焚身。

沙灘暴曬，滿身通紅，慾火焚身。

有心人各自加熱，血仍未冷。

與時間競賽

六點正即起刷牙洗面剃鬚push-up啞鈴，
只帶八達通、硬幣、鎖匙、泳鏡，
六點半第一個落水游完一千即閃，
唔沖涼唔抺身直接回家，
七點二只有十分鐘時間梳洗，
無時間諗所有野臨瞓前執定，
Gel唔切頭帶返工Gel，
上衣未穿、鞋帶未綁就跑到大堂，
廿秒內著衫、綁帶、帶錶，
出電梯即刻百米短跑至巴士站，
七點四岩岩趕上車遲半分鐘都死。

family nite

多年以來，除了大時大節、紅事白事和外婆壽宴大家會聚首一堂，
從來未試過好似今次咁多人一齊出黎食飯飲野。
我地終於繼承了上一代的傳統，大伙兒一起灌紅酒。
既然係表哥主場，我地獲得最好既招待，
坐響全店唯一既VIP房(minimum要6k)，
由頭到尾食左四粒鐘廿道菜十分滿足，
最精彩既往往放響最後，檸檬雪杷令人一試難忘，
dessert 全free，紅酒任開，每人唔駛兩舊水!!
晚上十二點幾，我地攞埋酒杯轉戰露天茶坐，
外面熄晒燈其他人閃晒，前有無敵維港做背境，
旁邊意大利餐廳不見人影只留下輕柔的jazz做墊底音樂，
響咁好既氣紛下把酒話當年胡扯亂笑，
令我覺得生於呢個家庭好幸福。

墜落的星星

一打開門，見到十幾個人全部都係女仔，差點以為去錯了蛋糕班。
班房細得番好少位，於是我坐響最前排既邊皮位置。
隔籬位既同學仔帶住副超，但完全遮擋唔到佢
閃既指甲，閃既衫，閃既鞋，同埋金光閃閃既袋，
就讓我當你是浮誇吧!
之後點名，聽到一個好熟悉既名字，
果位咁閃耀既同學仔原來係一位曾經出盡風頭既亞姐；
如今成了一顆墜落的星星，
滿地碎片仍閃閃發亮。

病於流感高峰期

1
昨天確診五十四宗，
潛伏帶菌不計其數。
要中唔出街都會中，
係無事亂黎都無事。

2
缺席日中吹水牙骹戰，
夜晚食唔到海鮮大餐，
錯過真人嘔心花槍show。

3
感冒咳嗽，可以睇中醫，戒口。
心靈受創，可以做催眠，戒色。

4
錢是仙丹，能醫百病。
財少身子弱，病向錢中醫。
結論：要非常努力拼命賺錢。

越活越年輕

佢地當我係細路，
竟然送個城堡蛋糕俾我，哼哼!!
事實上，我的確好低能又易滿足，
呢個城堡完全滿足到我。
成日話我言行舉止同細路無分別，
哈哈細路咁可愛似佢地有乜唔好，
只要讓大人見著開心，
有時偷雞賴皮同懶散少少都無問題，
適當既時候討人歡喜，自然有人錫，
被寵既感覺實在太好。

棋樂無窮

全球排名第六的dominion，
落訂後問左幾次都話無貨，
讓我足足苦候半年才到手，
結果真係名不虛傳變化多端，
我們今天玩了三場都唔悶，
等咁耐都係值得既。
另外同場玩了FBI，
一個別開生面的auction遊戲，
機制簡單鬥智鬥心理；
一直想玩而未玩的jungle speed，
論刺激鬥速度比blink尤有過之，
兩者輕巧得來樂趣十足，
但講深度和策略性都係dominion勁。

快樂是一種重覆的節奏

無論幾點返屋企，
總係唔想錯過假期早晨同爸媽飲茶的機會。
朝早飲茶，晏晝又飲茶，在同一間茶樓。
尋日見兩個表弟，今日見兩個表妹，
同最close的屋企人一齊，
做乜都好，都令人感到幸福。

糜爛有時

猜枚、劈酒、煲煙、狂呼至聲嘶力竭……

一年一度的歐聯決賽festival，
場內曼聯巴塞fans各半氣紛最好，
前後半場既吶喊聲有明顯分別，
原來買和波既馬會fans最多至真。
睇住曼聯球迷既沮喪樣令我心情大佳，
邊聽黃興桂講廢話邊鬧佢實在係最佳娛樂。
所有討厭曼聯既球迷，無論你係哪家粉絲，
今日我地同一陣線齊齊開香檳慶祝!

睇埋捧杯，尖沙咀依然一街都係人，
的士、小巴、巴士、地鐵通通冚旗，
在此日非日、夜非夜的尷尬時份，
天空由灰轉藍， 街上遊人變鬼，
全部有家歸不得。