越食越快樂

近日胃口超好，
早午晚三餐都吃得比往日多，
晚上吃完正餐再食麵包，
午餐吃雙份還要吃月餅，
運動量不變而體重亦不變，
完全諗唔到究竟係點既一回事，
只係知道食得越多我越開心。

吃得開

此韓燒店非常熟悉，
原來幾年前曾經到訪，
還記得當天吃得開懷。
這些日子彼此各有經歷，
今天開懷如故。
食材雖然普普通通，
勝在爐火夠猛邊燒邊吃，
那些熱呼呼的烤肉香氣四溢，
令心情和胃口好得可以吞下整間店。

精華盡在表層

脆炸響鈴，原來是杭州的炸腐皮卷，
看似平平無奇，妙在入口脆、沾舌溶，
有趣的是食完好似無食過咁。
友人說除了腐皮乜都無，
我卻認為裡面空無一物更能突出其質感，
讓你將注意力全集中在表層。

盡飲美色

前日一罐愛爾蘭健力士黑啤，
昨晚一瓶波爾多二千年紅酒，
今朝一杯北海道三點六牛乳。

你快樂所以我快樂

平日只吃牛奶公司三色雪糕的爸媽，
今天竟然吃起Dreyer’s來。
阿媽叫我一齊食，但我仍然戒口；
看著他們吃得津津有味的樣子，
比起吃到自己肚裡更受用。

有時夜晚返到屋企無野食，
阿爸阿媽唔響度，話去拍拖叫我食自己，
這樣的晚餐我一個人都吃得很起勁。

跟番邦吃番邦菜

雖然蔡瀾一年推薦百九幾間食肆，
但跟佢搵食總唔會衰得去邊。
傳聞最正宗既馬來菜館，
駐場師傅夠噸位，
壓陣表演無甩底。
先來飛天薄餅轉轉轉，
再來高低奶茶拉拉拉，
泡泡疊到好高又企得穩，
吹佢唔脹但杯奶茶真係好脹。
我地亂點牛羊咸甜薄餅，
甜耶耶既薄餅要混埋辣汁先顯出真味；
就好似患左蒙古症既聾小姐，
要撈埋耶律先生才見真章。
食野時我地講起葉一南，
蒙古小姐問係咪健一郎？
錯到無譜呀，聽錯都算，
仲要講錯，但耶律先生明白佢，
知道佢想講既係健三郎(大江健三郎)!!
真係俾佢地吹脹，脹過杯奶茶。

生活調味料

文學蔥配科學蒜，小炒香氣四溢。
藝術薑撘音樂椒，上湯辣得過癮。

如人飲水

她在清水放下一片甘草，霎眼滿杯澄黃，
飲完舌頭還有甘味，寂寞也揮發著餘香。

法國大餐

生蠔、鮮湯、沙律、西冷、龍蝦、燉蛋，
Soho真係so「好」呀，食好野，好幸福。

味蕾在舌頭，盡情品嚐，
味道留在心，長存回憶。

三隻小豬的故事

夜晚去左號稱全港唯一做吉列的xx，
佢咁把炮我地當然要等位，
成日行到腳都跛又攰又餓，
大家等唔切買個包充飢，
睇住個display覺得好少野唔係好抵食，
又猜度緊百幾蚊塊豬排可以有幾好食。
入去有卡位係好兆頭，
首先每人來一碗芝麻，
俾人自己磨磨磨好好玩，
磨到變紛完全志不在食，
但香氣四溢齌聞都好滿足。
我地個個叫定食人人有豬排，
心裡面一直懷疑緊有幾好食既豬排，
哈哈豬排始終係豬排可以有幾好食!
反而個炸蝦又大又正沙律醬更無得頂，
點過炸蝦沙律醬，豬排即刻變鳳凰。
但係今晚既高潮完全係反高潮，
因為主角係飯同菜，
原因講出黎都失禮竟然係「無限refill」，
大胃王先生聽到白飯任裝表現極度亢奮，
即刻高調宣佈「貴野食得飽感覺良好」，
起初我對呢個論調嗤之以鼻，
大佬，菜任食飯任裝駛唔駛咁高興，
但越食就越認同呢個貌似好廢既講法。
點解？因為呢度d菜同飯真係好好食，
直頭有點妹仔大過主人婆既感覺，
當然珍珠米好食都係要配吉列野，
條友食左三大碗飯我地都兩碗，
食極都仲有米既感覺真好，
呀，我竟然認同個低能仔!!
食食下聽到隔籬有人唱生日歌，
我心諗我未生日唔駛咁快同我慶祝，
響佢地唱完之際我比佢地先一步拍手掌，
比人先一步高興既感覺良好，
然後更靈機一觸話反正白飯任裝，
麻煩waitress小姐送碗白飯過隔籬(好似人地送酒咁)，
然後舉高碗飯向隔籬微微點頭示意表示友好。
講完無聊野講番個配菜，sorry應該係主菜，
竟然係我從來都無好感既椰菜，
但切到好幼好幼個質感唔同晒，
而且仲有兩款醬汁任你點，
柚子味很好紫菜味更勝一籌，
入口又酸又爽非常醒胃，
除左d菜要不停refill，我地連d醬都要refill，
定食變任食再變狂食，食到好飽開心到暈。
食完大家坐響度攤屍，某人慨嘆今次真係食到隻積咁，
豬先生話成日聽都唔知個「積」字點解，
大家都認同但又唔知點解，然後豬先生再話，
好似有人講「做到隻積」無人講「食到隻積」喎，
係喎，一開始就錯左。
豬小姐問係咪JQK個J，大家都投晒降無言以對，
故事就此結束。

Molecular Gastronomy

Appetizer

飲食金字塔四重天：
第一層，原始需要。>>>解決溫飽問題
第二層，味覺滿足。>>>飲食節目花瓶口頭禪「好味呀」
第三層，環境賣相。>>>米芝蓮或Petite Bourgeoisie之選
第四層，天地人和。>>>食得有feel最緊要夾

Main Dishes

那天，
早午餐都吃得豐富，
晚餐要好好滿足味覺，
黎得既都係Petite Bourgeoisie，
餐前我地飲red & white感覺良好。
萬事俱備，有機會一次過滿足四個願望，
誓估唔到呢餐連最基本既問題都解決唔到。
幾道菜主要由泡沬(包括Nitrogen)煮成，
我地一面食泡一面飲酒，越食越餓，
有點dizzy，信心開始動搖。
當我們饑腸漉漉諗緊之後去邊度大擦一餐，
「西瓜刺身」突然出現，令人稍稍安心終於可以有野落肚。
師傅拿起大大塊魚腩，用刀切成片片上碟，
放在面前的是活活的吞拿魚刺身。
用筷子夾起，輕輕一咬，完全是魚生的質感，
但味道卻是地地道道的西瓜，口中是真正的西瓜汁和肉!!!
此刻我看不見、聽不見、思考停頓，
所有感覺細胞沉浸於視覺、觸覺和味覺交織而成的食物幻覺中。
經歷了一趟魔幻飲食之旅，
甚至覺得之後再吃甚麼都無所謂，
往後一切都是賺到了。

Dessert

從金字塔出發，橫越沙漠，遙望綠洲，卻發現原來是一場幻覺。
像所有沙漠上的行人，明知是海市蜃樓仍繼續前進，
身陷幻覺中無法自拔，依然甘之如飴。